ଭାରତ ଆସୁଛନ୍ତି କାନାଡ଼ା ପ୍ରଧାନମନ୍ତ୍ରୀ ମାର୍କ କାର୍ନି: ଦ୍ୱିପାକ୍ଷିକ ସମ୍ପର୍କ ସୁଧାରିବାକୁ ବଡ଼ ପ୍ରୟାସ

ନୂଆଦିଲ୍ଲୀ/ଓଟାୱା: ଭାରତ ଓ କାନାଡ଼ା ମଧ୍ୟରେ ବହୁ ଦିନ ଧରି ଲାଗି ରହିଥିବା ତିକ୍ତତା ଦୂର ହେବାକୁ ଯାଉଛି। କାନାଡ଼ା ପ୍ରଧାନମନ୍ତ୍ରୀ ମାର୍କ କାର୍ନି ଆଜି ନିଜର ପ୍ରଥମ ସରକାରୀ ଭାରତ ଗସ୍ତରେ ବାହାରୁଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟାରିଫ୍ ଚେତାବନୀ ଏବଂ କାନାଡ଼ାକୁ ଆମେରିକାର ‘୫୧ ତମ ରାଜ୍ୟ’ ଭାବେ ଅଭିହିତ କରିବା ଭଳି ବିବାଦୀୟ ବୟାନ ମଧ୍ୟରେ କାର୍ନିଙ୍କ ଏହି ଭାରତ ଗସ୍ତ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ମନେକରାଯାଉଛି।

ଗସ୍ତ ସୂଚୀ:

କାନାଡ଼ା ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟର ସୂଚନା ଅନୁଯାୟୀ, ଗୁରୁବାର ସ୍ଥାନୀୟ ସମୟ ସକାଳ ୧୦ଟାରେ (ଭାରତୀୟ ସମୟ ରାତି ୮:୩୦) କାର୍ନି ଭାରତ ଅଭିମୁଖେ ଯାତ୍ରା କରିବେ। ସେ ସର୍ବପ୍ରଥମେ ମୁମ୍ବାଇରେ ପହଞ୍ଚିବେ ଏବଂ ପରେ ନୂଆଦିଲ୍ଲୀ ଗସ୍ତ କରିବେ। ଏହି ଗସ୍ତ ମାର୍ଚ୍ଚ ୨ ତାରିଖ ପର୍ଯ୍ୟନ୍ତ ଚାଲିବ, ଯେଉଁଠାରୁ ସେ ଅଷ୍ଟ୍ରେଲିଆ ଓ ଜାପାନ ଗସ୍ତରେ ବାହାରିବେ।

ମୁଖ୍ୟ ଏଜେଣ୍ଡା: ବାଣିଜ୍ୟ, ଶକ୍ତି ଏବଂ AI

ଦିଲ୍ଲୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ମାର୍କ କାର୍ନିଙ୍କର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହେବ। ଏହି ବୈଠକରେ ଦୁଇ ଦେଶ ମଧ୍ୟରେ ବାଣିଜ୍ୟ, ଶକ୍ତି, ପ୍ରଯୁକ୍ତିବିଦ୍ୟା, କୃତ୍ରିମ ବୁଦ୍ଧିମତା (AI), ପ୍ରତିରକ୍ଷା ଏବଂ ସାଂସ୍କୃତିକ ସମ୍ପର୍କକୁ ନୂତନ ଉଚ୍ଚତାକୁ ନେବା ପାଇଁ ଆଲୋଚନା ହେବ। ଏହା ସହିତ କାନାଡ଼ାରୁ ଭାରତକୁ ୟୁରାନିୟମ୍ ରପ୍ତାନି ବୃଦ୍ଧି ନେଇ ଏକ ବଡ଼ ଚୁକ୍ତି ହେବାର ସମ୍ଭାବନା ରହିଛି।

ଟ୍ରମ୍ପଙ୍କ ପ୍ରଭାବ ଓ ବାଣିଜ୍ୟ ବିବିଧତା:

ଆମେରିକା ଉପରେ କାନାଡ଼ାର ଅତ୍ୟଧିକ ନିର୍ଭରଶୀଳତା କମାଇବା ପାଇଁ କାର୍ନି ଏହି ରଣନୀତି ପ୍ରସ୍ତୁତ କରିଛନ୍ତି। ନିକଟରେ ଡୋନାଲ୍ଡ ଟ୍ରମ୍ପ କାନାଡ଼ାର ସାର୍ବଭୌମତ୍ୱ ଉପରେ ପ୍ରଶ୍ନ ଉଠାଇବା ସହ କାନାଡ଼ା ସାମଗ୍ରୀ ଉପରେ ୧୦୦ ପ୍ରତିଶତ ଟାରିଫ୍ ଲଗାଇବାକୁ ଧମକ ଦେଇଛନ୍ତି। ଏଭଳି ପରିସ୍ଥିତିରେ ଭାରତ, ଜାପାନ ଏବଂ ଅଷ୍ଟ୍ରେଲିଆ ଭଳି ଦେଶମାନଙ୍କ ସହ ସମ୍ପର୍କ ଦୃଢ଼ କରି କାନାଡ଼ା ନିଜର ବାଣିଜ୍ୟିକ ବଜାରକୁ ସୁରକ୍ଷିତ ରଖିବାକୁ ଚାହୁଁଛି।

୮ ବର୍ଷ ପରେ କୌଣସି କାନାଡ଼ା ପିଏମଙ୍କ ଭାରତ ଗସ୍ତ:

୨୦୧୮ରେ ତତ୍କାଳୀନ ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋଙ୍କ ବିବାଦୀୟ ଭାରତ ଗସ୍ତର ପ୍ରାୟ ୮ ବର୍ଷ ପରେ ଜଣେ କାନାଡ଼ା ପ୍ରଧାନମନ୍ତ୍ରୀ ଭାରତ ଆସୁଛନ୍ତି। ସେପ୍ଟେମ୍ବର ୨୦୨୩ରେ ହରଦୀପ ସିଂ ନିଜ୍ଜର ହତ୍ୟାକାଣ୍ଡକୁ ନେଇ ଦୁଇ ଦେଶ ମଧ୍ୟରେ ସମ୍ପର୍କରେ ବଡ଼ ଫାଟ ସୃଷ୍ଟି ହୋଇଥିଲା। ତେବେ ୨୦୨୫ ଜୁନ୍‌ରେ ଜି-୭ ସମ୍ମିଳନୀ ଏବଂ ପରବର୍ତ୍ତୀ ସମୟରେ ଜୋହାନେସବର୍ଗ ଜି-୨୦ ସମ୍ମିଳନୀରେ ମୋଦୀ ଓ କାର୍ନିଙ୍କ ମଧ୍ୟରେ ହୋଇଥିବା ସକାରାତ୍ମକ ଆଲୋଚନା ଏହି ଗସ୍ତ ପାଇଁ ବାଟ ଫିଟାଇଛି।

ନିବେଶ ଓ ନୂତନ ସୁଯୋଗ:

ନିଜ ଗସ୍ତ କାଳରେ କାର୍ନି ଭାରତର ବଡ଼ ବଡ଼ ଶିଳ୍ପପତି ଓ ବ୍ୟବସାୟିକ ନେତାମାନଙ୍କୁ ମଧ୍ୟ ଭେଟିବେ। କାନାଡ଼ାରେ ନିବେଶର ସୁଯୋଗ ସୃଷ୍ଟି କରିବା ଏବଂ ଭାରତୀୟ ବ୍ୟବସାୟିକ ପ୍ରତିଷ୍ଠାନ ସହ ସାଂଝିଦାରୀ ବଢ଼ାଇବା ଉପରେ ସେ ଗୁରୁତ୍ୱ ଦେବେ।

ଭାରତ-କାନାଡ଼ା ମଧ୍ୟରେ ‘ବ୍ୟାପକ ଅର୍ଥନୈତିକ ଭାଗିଦାରୀ ଚୁକ୍ତି’ (CEPA) ପାଇଁ ପୁଣି ଥରେ ଆଲୋଚନା ଆରମ୍ଭ ହେବାକୁ ଯାଉଥିବାରୁ, ଏହି ଗସ୍ତ ଦୁଇ ଦେଶର ଅର୍ଥନୀତି ପାଇଁ ଏକ ମାଇଲଖୁଣ୍ଟ ସାବ୍ୟସ୍ତ ହୋଇପାରେ।

#WATCH | Visuals from outside the High Commission of Canada, in Delhi. During their meeting in Kananaskis, Canada, PM Narendra Modi and Canadian PM Mark Carney have agreed to designate new High Commissioners, with a view to returning to regular services to citizens and businesses… pic.twitter.com/5INRicQLdY

— ANI (@ANI) June 18, 2025